Vern av regnskog og nyplanting representerer eit potensiale for global reduksjon av klimagassar med opp mot 40 prosent. Om lag halvparten av dette kjem frå brenning av regnskog og resten frå potensialet ved nyplanting. Det er prisverdig av regjeringa å prioritere internasjonal innsats for verning av regnskog. Men meldinga om framlegg til ny skoglov i Brasil (Aftenposten 30. januar 2011) og rapportar frå andre land, viser kor vanskeleg det er å skape konkrete resultat over tid. Tiltak for å redusere avskoging blir sterkare påverka av sneversynte nasjonale interesser enn av internasjonal bistand.
Gratis pengar
Det er lett å inngå avtalar for mottak av gratis pengar frå Noreg, men verre å sikre at måla blir gjennomførde. Den største faren for vern av regnskog med norske bistandspengar ligg i økonomisk og politisk korrupsjon. Eit døme er Indonesia der avskoginga går føre seg med like stor iver som tidlegare, dreve fram av mektige økonomiske krefter med politisk støtte. Og den som ventar reint spel frå Den Demokratise Republikken Kongo, bør vere førebudd på vonbrot. Eit døme på dette er Kinas kjøp av 2,8 millionar dekar regnskog for planting av oljepalmer og andre kommersielle vekster. Dette er ein skrikande kontrast til planlagde vernetiltak i Afrika med norske pengar.
Hopar seg opp
Medan løyvingar på mange miliardar kroner hopar seg opp i Noreg på grunn av mangel på verdige prosjekt i m.a. Brasil, er det på tide å satse større på nyplanting av skog som bind opp klimagassar og samstundes gir økonomiske verdiar innbyggjarane i områda vil ta vare på.
IPCC har dette med i sine klimaløysingar. Den mest kostnadseffektive innsatsen er skogplanting i tropiske område, der nye planter bind opp 50 kg CO2 per år, i motsetnad til planter i tempererte område som gir 13 kg per år. Det finst store område i tropene som er øydelagde av svedjebruk og anna, men som kan rehabiliterast med skogplanting som t.d. gummitre. Dette gir gode inntekter og varige arbeidsplassar. For tida er vi med i eit slikt prosjekt i Sri Lanka der det er eit stort potensiale for planting på fleire millionar mål brakkmark. Tar vi med andre område og andre land med liknande potensiale, blir resultatet langt større, med frigjering av millionar menneske frå akutt fattigdom og oppbinding av store mengder CO2.
Istaden for at milliardar av kroner til vern av regnskog frys på konto i Noreg, kunne det til dømes etablerast eit fond som i form av lån kan støtte tiltak for nyplanting. Med inntening frå skogsdrifta kan lånet betalast tilbake og brukast til ny innsats andre stader. Dersom midlar kan skaffast til lokalsamfunn og organisasjonar med kapasitet til profesjonell innsats på dette området, vil det skape økonomisk verdiar og betre lokalmiljø, i tillegg til reduksjon av klimagassar som trugar vår felles framtid.
Det er tid for nytenking frå norsk side før ein møter seg sjølv i døra med ei ny politisk "månelanding".
Kommentarer