Eg trur dessverre nei, seier kulturminister Anniken Huitfeldt i Aftenposten måndag 8. februar. Saman med Norsk Kulturråd har ho nyleg vore på studietur og fått verdifulle impulsar i London. Det Norske Teatret har òg vore på studietur til London. Vi drog i 2007. Også vi blei imponerte. Inspirasjonen ga støtet til å utvikle satsinga vår på publikumsbygging med særleg vekt på å nå unge og innvandrarar.

Det Norske Teatret har på få år etablert seg blant landets fremste kulturinstitusjonar innan formidling til ungdom. Parallelt med teatrets kunstnarlege satsing på målgruppa, har det vore jobba med tilrettelegging av eit omfattande formidlingsarbeid. Sidan 2007 har vi etablert strukturar for kreativ læring, skolesamarbeid og ungdomskort. Ei rad populære formidlingstiltak som Teaterverkstad, Fagdag, 360 grader teater, På scenekanten, Baksnakk, Arbeidsplassen, Ambassadørprogram og Familiebonus vitnar om variasjon og kreativitet. Også Det Norske Teatret opererer med ulike rabattar. Alle mellom 16 og 25 år kan få med seg teatrets produksjonar for berre 85 kroner gjennom Ungdomskortet. Det er verdt å merke seg at i Storbritannia blir dette arbeidet finansiert med øyremerkte middel frå det offentlege. Summane er astronomiske samanlikna med norske forhold.

Statsråden er med rette imponert over det formidlingsarbeidet som blir gjort ved dei engelske institusjonane. Men vi må med skjult stoltheit få melde at vi ikkje ligg lysår etter. Når det gjeld dei nye digitale kanalane er dei i full bruk. Det er lett å bli blenda av vellukka prosjekt i Storbritannia, men statsråden må ikkje lukke augo for at eit viktig og langsiktig arbeid med formidling blir gjort berre få kvartal frå kontoret hennar. Det Norske Teatret er, om ikkje på høgde med, så i alle fall ikkje langt unna det beste dei har i utlandet.